लोकसंघर्ष

सामान्य माणसाला ज्या दैनंदिन नागरी समस्यांना सामोरं जावं लागत आहे त्या केंद्रस्थानी ठेवून आम्ही पुण्यातील काही वकिलांनी, उच्च शिक्षित व कष्टकरी नागरिकांनी लोकसंघर्ष पक्षाची स्थापना केली. तरुणांनी, शिक्षितानी, कष्टकरी, कार्यक्षम लोकांनी सक्रिय राजकारणात सहभागी व्हावं या उद्देशाने कामं चालू केल. सुरुवातीला आमची थट्टा झाली पण वेळोवेळी आम्ही घेत असलेल्या भूमिका, कार्यपद्धती सामान्य लोकांना आवडू लागली. सद्याच्या अत्यंत प्रतिकूल राजकीय, सामाजिक परिस्थितीही आम्ही परखडपणे, निर्भीडपणे, बेधडक पद्धतीने नागरी समस्यांना वाचा फोडत आहोत, लिहीत आहोत, बोलत आहोत. आमचं हे निर्भीड आणि परखड काम सामान्य माणसांच्या काळजाला हात घालत आहे हे पाहून खूप बरं वाटतं. त्यामुळे आमच्या या बेधडक, परखड आणि निर्भीडपणाला मत देऊन साद घालायची की नाही हे आता तुम्हा माय बाप जनतेने ठरवायचे आहे.

आम्हांला मतदान करुन आमचं बळ वाढवायचे की नाही हे ही तुम्हीच ठरवायचे आहे. तुम्ही आमच्या पदरात मतं टाकली तर तुमच्या समोर एक आदर्श राज्यव्यवस्था शिवछत्रपतीच्या प्रेरणेने आम्ही नक्की उभी करू शकतो हा आम्हांला ठाम विश्वास आहे. कायद्याचे अभ्यासक असल्याने हे ढिम्म प्रशासन कसं हालवायचे हे आम्हाला चांगल समजतं. त्यामुळं शेवटी तुम्ही ठरवायचं आहे की आमच्या सारख्या सक्षम पर्यायाला मतरूपी आशीर्वाद देऊन संधी द्यायची की नाही. प्रश्न राहिला की आज देशात अनेक दिग्गज आहेत, अनेक पर्याय आहेत मग आम्ही तुम्हाला मतं का द्यायचं? तर एक लक्षात घ्या की आज आपल्या देशाला सक्षम पर्यायची नितांत गरज आहे. ही गरज आपण ओळखली पाहिजे आणि त्यासाठी योग्य पावलं उचलली पाहिजेत आणि आपल पुणे हे एक असं शहर आहे जिथे नेहमी क्रांतीला सुरुवात झाली आहे. जे पुण्यात सुरु होत ते नंतर देशभर पसरत.